"I Would Not Allow It": Baste Duterte, Walang Alam sa 19 GenCorp Contracts ng Davao City; Hinarap ang Impeachment Court

Iginiit ni Davao City Mayor Sebastian "Baste" Duterte sa impeachment trial ng kanyang kapatid na si Vice President Sara Duterte nitong Martes, September 29, na wala siyang direktang kaalaman sa 19 na kontrata ng lungsod sa GenCorp Industries Inc., isang kumpanyang nakalista bilang business interest sa SALN ng Bise Presidente.

Nauwi sa iisang tanong ang direct at cross-examination: may conflict of interest ba nang igawad ng Davao City government ang mga kontrata sa GenCorp habang Bise Presidente na ang kanyang kapatid?

Paulit-ulit na sinabi ng alkalde sa korte na sa record lang siya maaaring sumagot dahil hindi niya personal na nireview ang mga contracts. Ayon kay Baste, ang bids and awards committee ng lungsod ang nag-evaluate sa GenCorp, at isang aide ang pumirma sa mga kontrata sa ilalim ng delegated authority. Hindi rin daw niya alam ang mga negosyo ng kapatid dahil, sa kanyang mga salita, "we simply do not discuss this."

Pero may hypothetical na lumitaw. Tinanong ni Presiding Officer Sen. Chiz Escudero kung papayagan ba ng alkalde ang anumang award sa GenCorp kung alam niyang stockholder ang kanyang kapatid.

"I would not allow it," sagot ni Baste.

Ang mga numbers:

• 19 food at catering contracts ang iginawad ng Davao City sa GenCorp mula 2022 hanggang 2026
• 15 dito ay sa pamamagitan ng small value procurement, na hindi nangangailangan ng public bidding
• 0 sa mga kontrata ang pinasok noong si Sara pa ang mayor ng lungsod

Ang connection ng GenCorp sa Vise President ay nasa kanyang SALN lang, kung saan nakalista siya bilang stockholder. Pero sa corporate records ng kumpanya na ibinahagi ng Securities and Exchange Commission (SEC) sa korte, hindi siya nakalista. Ayon kay Escudero noong Lunes, hindi pa naaayos ang pagkakaibang ito.

3 highlights of Day 31 Impeachment Trial

1. Walang alam sa GenCorp, pero business partner ng isang stockholder nito

Sa direct questioning ng prosecution counsel na si Theodore Te, sinabi ni Baste na wala siyang personal na kaalaman sa GenCorp bago ito lumabas sa impeachment trial.

Kinumpirma rin niyang si Jaime T. Cruz, ang major stockholder ng GenCorp, ay kanyang business partner sa isa pang kumpanya, na ang 2026 corporate filing ay naglilista rin sa kapatid niyang si Paolo Duterte. Ayon kay Baste, hindi niya kailanman napag-usapan ang GenCorp kay Cruz at hindi niya alam ang stake nito roon.

Tinanong ni Sen. Risa Hontiveros ang alkalde tungkol sa relasyon ni Cruz sa mga Duterte.

"Maybe not entirely the family, but he's a friend of my father. He's a known businessman in Davao."

Ayon kay Hontiveros, "close" ang relasyong iyon.

2. "The witness is not the one on trial"

Paulit-ulit na pinaalalahanan ni Escudero ang prosekusyon na iugnay ang kanilang mga tanong sa article na dinidinig, dahil "the witness is not the one on trial here."

Ginamit naman nina Sen. Alan Peter Cayetano, JV Ejercito, Bong Go at Joel Villanueva ang kanilang turn para ipaliwanag na hindi kayang suriin ng isang alkalde ang bawat dokumentong pinipirmahan niya.

Sinabi ni Sen. Ping Lacson na "never denied anything" ang alkalde, at tinanong kung nabanggit ba ng kanyang mga abogado ang Arias doctrine, na nagpapahintulot sa mga hepe ng opisina na umasa nang may mabuting loob sa kanilang mga subordinate.

Tinanong naman ni Sen. Erwin Tulfo kung siya mismo ang magsusuri sa mga kontrata. Hindi tiyak ang sagot ni Baste:

"Well, as long as my sister's name, the vice president's name was not on the contract then there's nothing."

3. Hindi kailangang sagutin ang 104 items

Inanunsyo ni Escudero ang desisyon ng korte sa request for admission ng prosekusyon sa mga 104 item tungkol sa bank at tax records nina VP Sara at ng kanyang asawa. Pumabor ang korte sa depensa: hindi kailangang sagutin ni Duterte ang mga ito dahil sa kanyang karapatan laban sa self-incrimination.

"The prosecution cannot shift its burden of proof to respondent through the simple expedience of a request for admission," ani Escudero.

Tinanggihan din ni Escudero ang pag-subpoena kay dating Sen. Antonio Trillanes, na nais ng prosekusyon na maging una nilang witness bukas. Ayon sa presiding officer, iniuugnay ng mismong mosyon ng prosekusyon ang testimonya ni Trillanes sa bank records na hindi pa naipapakita:

"The cart cannot be put ahead of the horse."

Gayunman, sinabi ni Escudero na walang pumipigil sa prosekusyon na kusang kunin si Trillanes bilang witness ngayong linggo nang walang subpoena. Nasa gallery ang dating senador habang nagtetestigo si Baste.

Source: Philippine Star